Termini Imerese, piazza Duomo in versi: “A chiazza granni”

A chiazza granni c’è sempri cunfusioni

na vota c’è u cumizziu na vota a pricissioni;

chistu è lu centru di tuttu u me paisi

c’è la Matrici e u Guvernu tirminisi.

Ci fannu li spittaculi, ci fannu li prutesti,

ci fannu la gran parti di tutti i nostri festi;

ci vannu nichi e vecchi a discurriri e passiari

ci fannu u tistamentu quann’è carnalivari.

Puru li picciotti ci fannu i siritini,

furriannu cu la machina o cu li motorini;

mentri c’è La Masa cu la sò spada mmanu

prontu a tutti l’uri pi fari lu guardianu.

A Termini sta chiazza è veru assai ‘mpurtanti;

cè puru lu Biatu ca varda la sò genti.